ސްކޫލް ތަޢާރަފު

ތިލަދުންމަތީ އުތުރުބުރީ ފިއްލަދޫ ސްކޫލު ބިނާކުރެވުނީ ރައްޔިތުން ގުޅިގެން، ރައްޔިތުންގެ ނުހަނު ބުރަ މަސައްކަތުންނެވެ. ފިއްލަދޫ ސްކޫލަކީ ފިއްލަދޫ ރައްޔިތުން ހޭލުންތެރިކޮށް، ދަރިވަރުންނަށް ތަޢުލީމާއި ތަރުބިއްޔަތު ދިނުމަށް ސަރުކާރާއި، ރައްޔިތުން ގުޅިގެން އުފެއްދި ސްކޫލެކެވެ. ފިއްލަދޫ ސްކޫލު ހިންގަން ފެށުނީ ""ޢިލްމު އުނގެނޭށެވެ. ސަލާމަތަކީ އެއީއެވެ."" މި މޮޓޯގެ ދަށުން ފިއްލަދޫރައްޔިތުންނާއި، ބެލެނިވެރިން ގުޅިގެންނެވެ. މިހާރު ސްކޫލު މިހުރި ބިމުގައި ފިއްލަދޫ ސްކޫލުގެ ނަމުގައި ސްކޫލު ބިނަކުރުމަށް ބިންގާ އެޅުނު، ތާރީޚަކީ 25 ފެބުރުއަރީ 1987 އަހަރެވެ. ބިންގާ އަޅުއްވައި ދެއްވެވީ ހއ.އަތޮޅު އަތޮޅުވެރިޔާ އަލްފާޟިލް އުތީމު އާދަމް ޢަބުދުއް ރަޙުމާނުއެވެ. އަދި 13 މާރިޗް 1987 ހއ.ފިއްލަދޫ ސްކޫލު ހުޅުވައި ދެއްވެވީ ވެސް އެމަނިކުފާނެވެ. ފިއްލަދޫ ސްކޫލު މިބަޔާކުރިގޮތަށް ބިނާކުރުމުގެ ކުރިން ވެސް އެކި ނަންނަމުގައި އެކި ގޮތްތޮތަށް އުނގަންނައިދިނުމުގެ މަސައްކަތް ކޮށްފައި ވެއެވެ. މިކަންކަން ހިނގފައިވަނީ ވަރަށް އާދައިގެ ގޮތެއްގައެވެ. މިގޮތުން ސްކޫލުގެ ނަމަށް ވެސް އެކި ދުވަސްވަރު ބަދަލުތައް އައިސްފައި ވެއެވެ. 04 ޖެނުއަރީ 1971 ގައި ފުރަތަމަ ރަޖިސްޓްރީ ކުރެވިފައިވަނީ "" މަކްތަބުލް ހިދާޔާ""ގެ ނަމުގައެވެ. އޭގެފަހުން 13 މާރޗް 1974 ގައި ސްކޫލުގެ ނަން "" މަކްތަބުލް ހިދާޔާ"" އިން މަކްތަބުލް ޞަބާޙުއަށް ބަދަލުކުރެވުނެވެ. އަދި 30 ޖުލައި 2017 ން ފެށިގެން މަދަރުސަތުއްޞަބާޙްގެ ނަމުން ފިއްލަދޫ ސްކޫލްގެ ނަމަށް ބަދަލުކުރެވިފައި ވެއެވެ. މިހާރު ފިއްލަދޫ ސްކޫލަކީ ސަރުކަރުން ހިންގާ ސަރުކާރު ސްކޫލެކެވެ.