ތަޢާރަފު

ޑރ. އިސްމާޢީލް ޝަފީޢު ތައުލީމީ ދާއިރާއަށް ޚިދުމަތްކުރަން ފެއްޓެވީ 2001 ވަނަ އަހަރު ގދ. އަތޮޅު މަދަރުސާގައި ވަގުތީ ޓީޗަރެއްގެ ގޮތުގައެވެ. މޯލްޑިވްސް ކޮލެޖް އޮފް ހަޔަރ އެޑިޔުކޭޝަނުން ކިޔަވައިދިނުމުގެ ރޮނގުން ފުރަތަމަ ޑިގްރީ ހާސިލްކޮށް، ކެމިސްޓްރީ އަދި ހިސާބު ޓީޗަރެއްގެ ގޮތުގައި މަސައްކަތްކުރުމަށްފަހު، ސްކޫލް މެނޭޖްމެންޓުގެ ދާއިރާއިން މާސްޓަރސް ޑިގްރީ ހާސިލްކޮށްފައިވަނީ 2011 ވަނަ އަހަރު ޔުނިވަރސިޓީ މަލާޔާއިންނެވެ. އޭގެ ފަހުން މިނިސްޓްރީއޮފް އެޑިޔުކޭޝަނުގެ ޑެޕިއުޓީ މިނިސްޓަރުކަމުގައި ޚިދުމަތްކޮށްފައިވެއެވެ. ޑރ. އިސްމާޢީލް ތަޢުލީމީ ދާއިރާއިން ޕީ.އެޗް.ޑީ ހާސިލްކޮށްފައިވަނީ 2019 އަހަރު އިނގިރޭސިވިލާތުގެ ދަރަމް ޔުނިވަރސިޓީއިންނެވެ. މި ވުޒާރާގެ މިނިސްޓަރުކަމުގެ ޒިންމާއާ ހަވާލުވުމުގެ ކުރިން، ދިވެހިރާއްޖޭގެ އިސްލާމީ ޔުނިވަރސިޓީގެ ސެންޓަރ ފޮރ ރިސަރޗް އެންޑް ޕަބްލިކޭޝަންގެ ޑީންގެ މަގާމު އަދާކޮށްފައިވެއެވެ. އެ މަގާމުގައި ހުންނެވިއިރު ކުރެއްވި މުހިންމު މަސައްކަތްތަކުގެ ތެރޭގައި މުދައްރިސުން ތަމްރީނުކުރުމުގެގޮތުން ކިޔަވައިދިނުމާއި، ތައުލީމީ ދާއިރާއިން އިލްމީ ދިރާސާތައް ކުރުމާއި، ދިރާސާތައް ވިލަރެސްކޮށް ޝާއިޢުކުރުމުގެ ކަންކަން ހަރުދަނާކޮށް ބެލެހެއްޓުން ހިމެނެއެވެ.