ސްކޫލް ތަޢާރަފު

އަރިއަތޮޅު އުތުރުބުރީ މަތިވެރީގައި ދިވެހި ސަރުކާރާއި މަތިވެރީ ރައްޔިތުން ގުޅިގެން ޤާއިމު ކުރައްވާފައިވާ މަތިވެރި ސްކޫލަކީ ދިވެހި ސަރުކާރުގެ ބަޖެޓުން ޚަރަދު ކުރައްވައިގެން ހިންގަވަމުން ގެންދަވާ ސްކޫލެކެވެ. މިސްކޫލު އއ. މަތިވެރީގައި ޤާއިމު ކުރައްވައި، މިނިސްޓްރީ އޮފް އެޑިޔުކޭޝަނުން ހިންގަވަމުން ގެންދަވަނީ މިރަށުންނާއި، އެހެން ރަށްރަށުން ވިޔަސް މިސްކޫލަށް ތަޢުލީމް ޙާޞިލްކުރުމަށް ބޭނުންވެގެން އަންނަ ކޮންމެ ދަރިވަރަކަށް ފަށާ ތަޢުލީމާއި، ޘާނަވީ ތަޢުލީމް އުގެނުމުގެ ފުރުޞަޠު ފަހިކޮށް ދިނުމަށެވެ. އއ.މަތިވެރި މަދަރުސާގައި ކިޔަވާދޭން ފެށިފައިވަނީ 18 އޮގަސްޓް 1980 ގައެވެ. އއ. މަތިވެރި މަދަރުސާގެ ނަމުގައި ހިންގަވަމުން އައި މި މަދަރުސާގެ ނަން މަތިވެރި ސްކޫލަށް ބަދަލުވެފައިވަނީ 2001 ވަނަ އަހަރުއެވެ. މަތިވެރި މަދަރުސާގެ ނަމުން މަތިވެރި ސްކޫލަށް ބަދަލުވުމަށްފަހު ފަށާ ތަޢުލީމުގެ ފެންވަރަށް ކިޔަވައި ދެމުން އައިސް 2006 ވަނަ އަހަރު ކޮމާސް ސްޓްރީމުން ޘާނަވީ ތަޢުލީމު ތަޢާރަފުކުރެވުނެވެ. މިގޮތުގެ މަތިން ޘާނަވީ ތަޢުލީމް ފުޅާކުރެވި 2008 ވަނަ އަހަރުން ފެށިގެން މިސްކޫލުވަނީ ޘާނަވީ ތަޢުލީމް ނިންމާ އިމްތިޙާނުތައް ބާއްވާ ސްކޫލެއްގެ ގޮތުގައި ހަމަޖައްސަވާފައެވެ. މިގޮތުން ވޭތުވެދިޔަ 2022-2023 ވަނަ އަހަރަކީ މިސްކޫލްގައި ޘާނަވި ތަޢުލީމް ނިންމާ އިމްތިޙާނުގައި ބައިވެރިވި 15 ވަނަ އަހަރެވެ. 2013 ވަނަ އަހަރު މިސްކޫލުގެ ސާނަވީ ދަރިވަރުންނަށް ކޮމްބައިން ސްޓްރީމް ތައާރަފް ކުރެވުނެވެ. އަދި 2015 ވަނަ އަހަރުން ފެށިގެން އައު މަންހަޖަށް މިސްކޫލުގެ ދަރިވަރުންނަށް ކިޔަވައިދޭން ފެށުނެވެ. އޭގެ ފަހުން 2017 ވަނަ އަހަރު މިސްކޫލްގައި ބީޓެކް ސްޓްރީމް ތަޢާރަފް ކުރެވުނެވެ. މިސްކޫލުގެ މަޤްޞަދަކީ މިސްކޫލުން ތަޢުލީމް ޙާޞިލްކުރަން އެދޭ ކިޔަވާ ޢުމުރުގެ ކޮންމެ ކުއްޖަކަށް މިސްކޫލުން އެއިރަކު ދެވެންހުރި އެންމެ މަތީ ފެންވަރަކަށް ތަޢުލީމް ދިނުމެވެ. މިމަޤްޞަދު ޙާޞިލް ކުރުމަށް ކުރެވޭ މަސައްކަތުގައި މިނިސްޓްރީ އޮފް އެޑިޔުކޭޝަނުން ކަނޑައަޅުއްވާ މުޤައްރަރަށް ކުދިންނަށް އުގަންނައި ދިނުމާއި، ކުދިންގެ ހުނަރުތައް ތަރައްޤީ ކުރުމަށް އިތުރު ޙަރަކާތްތައް ހިންގުމާއި، ތަނަށް ބޭނުންވާ ޒަމާނީ ވަޞީލަތްތައް ހޯދައިދިނުމާއި، ޒަމާނަށް އަންނަ ބަދަލާ ގުޅިގެން ކަންތައްތައް އިސްލާޙުކޮށް ތަރައްޤީ ކުރުމާއި، އަދި ވީއެންމެ ފުޅާދާއިރާއެއްގައި ބެލެނިވެރިންނާއި، ގުޅިގެން މަސައްކަތް ކުރެވެއެވެ. މިކަމުގެ އިތުރުން ދަރިވަރުންގެ ޝުޢޫރުތައް ދެނެގަތުމާއިއެކު، ރަޙުމަތްތެރި މާހައުލެއް ޤާއިމު ކުރުމަށް ދަރިވަރުންނާއި، ގުޅިގެން މަސައްކަތް ކުރެވެއެވެ.