ސްކޫލް ތަޢާރަފު

ތަޢާރަފް މި ސްކޫލް 1940 ގެ މެދެއްހާ ހިސާބުން ފެށިގެން ހިންގަން ފެށުނީ ކޮޅުމަޑުލު ދިޔަމިގިލީ މަކްތަބުލް އިރުޝާދުގެ ނަމުގައެވެ. އެއިރު މުދައްރިސުންގެ ގޮތުގައި މަސައްކަތް ކުރެއްވީ ތ.ދިޔަމިގިލިީ ފިނިފެންމާގޭ މޫސާ ދީދީ އާ، ތ.ދިޔަމިގިލީ ލަޑައިގޭ ޢަލިދީދީ އާ، ތ.ދިޔަމިގިލީ، ނަވަރަތަށިގޭ އިބްރާހީމް އާއި ތ.މަޑިފުށީ ކަލޭފާނެވެ. 1956 ން ފެށިގެން މުދައްރިސެއްގެ ގޮތުން މަސައްކަތް ކުރެއްވީ ސާރާ މޫސާދީދި، ޝަބްނަމީގެ، ތ.ދިޔަމިގިލި އާއި އިބްރާހީމް ދީދީ، ކުންޑިގެ ތ.ދިޔަމިގިލި އެވެ. އޭގެފަހުން، 25 ޖޫން 1980 ގައި ދިޔަމިގިލީ ""މަކްތަބުލް އިރުޝާދު"" ގެ ނަމުގައި ރައްޔިތުންގެ ސްކޫލެއްގެ ގޮތުގައި ރަޖިސްޓްރީ ކުރެވުނެވެ. އަދި 26 އޮކްޓޫބަރ 1993 ގައި މިހާރު ސްކޫލު ހިނގަމުންދާ ޢިމާރާތަށް ބަދަލުކޮށް ދިޔަމިގިލީ މަދަރުސާގެ ނަމުގައި ރައްޔިތުންގެ ސްކޫލެއްގެ ގޮތުގައި ރަޖިސްޓްރީ ކުރެވުނެވެ. އަދި 1 އޮގަސްޓް 2005 ން ފެށިގެން ތ. ދިޔަމިގިލީ މަދަރުސާ ސަރުކާރުގެ ސްކޫލެއްގެ ގޮތުގައި ރަޖިސްޓްރީ ކުރެވުނެވެ. އޭގެ ފަހުން، 7 ޖެނުއަރީ 2016 ގައި ތ.ދިޔަމިގިލީ މަދަރުސާގެ ނަން ތ.ދިޔަމިގިލީ ސްކޫލް މިނަމަށް ބަދަލުކުރެވުނެވެ. ދިޔަމިގިލީ ސްކޫލަކީ، ފައުންޑޭޝަން ސްޓޭޖުން ފެށިގެން ކީ ސްޓޭޖް 4 ށް ކިޔަވައިދޭ ސްކޫލެކެވެ. މި ސްކޫލުގައި ކިޔަވައިދެވެމުން ދަނީ ކޮމްބައިން ސްޓްރީމުގެ މާއްދާތަކެވެ. އަދި ބީ ޓެކް ސްޓްރީމާއި ބޭނުން ވެއްޖެ ހިނދެއްގައި ދަސްވާރު ކުރިޔަށް ގެންދެވެއެވެ.