ސްކޫލް ތަޢާރަފު

ތ. އޮމަދޫ ސްކޫލަކީ ބޭނުންތެރި، ޒިންމާދާރު، ހިއްމަތްތެރި، އަޒުމް ވަރުގަދަ ، ދިވެހި ވަންތަކަންހުރި، ވަޠަނީ އަދި ފަންނީ ޤާބިލްކަން ހުރި މުވައްޒަފުންތަކެއް ގަޢުމީ އަދި އިސްލާމީ ރިވެތި ފޭރާމުން ޒީނަތްތެރި ކުރެވިފައިވާ ދަރިވަރުން ތަކެއް ބިނާ ކުރުމަށާއި، އިސްލާމީ ތަރުބިއްޔަތުގެ މަތިން ތަޢުލީމު ކުރިއެރުވުމަށާއި، މި ތަނުން ދަސްވެނިވެގެން ދާ ދަރިވަރުންނަކީ ދިވެހި ބަހުން ވިސްނާ، ޤައުމީ ރޫހު ހުރި ފަޚުރުވެރި ބަޔަކަށް ހެދުމަށްޓަކައި ތަފާތު އިތުރު ހަރަކާތްތަކާއި ތަޢުލީމީ ހަރަކާތްތައް ހިންގަމުންދާ، ހަށިފަސޭހަ، ހިތްގައިމު ތަޢުލީމީ މާހައުލަކާއި ތަޢުލީމު އުނގެނެން ފަހި ވެށްޓެއް އޮތް ކާމިޔާބު ސްކޫލެއްގެ އަސާސީ ސިފަތައް ހުރި ސްކޫލެކެވެ. ތ. އޮމަދޫ ސްކޫލަކީ ކަމިޔާބުވުމަށް ހިތްމަތާއެކު މަސައްކަތް ކުރުމަކީ މި ސްކޫލްގެ މޮޓޯ ކަމުގައި ބަލައިގެން ނުގުޑާނެ ފަދަ ވަރުގަދަ އަޒުމަކާއެކު މަސައްކަތް ކުރަމުން އަންނަ ސްކޫލެކެވެ. މި ސްކޫލުގެ ތަޞައްވަރަކީ އަމިއްލަ ނަފްސަށާއި ސްކޫލަށް އަދި ދިވެހި ޤައުމަށް ރީތިނަން ހޯދައިދިނުމަށް މަސައްކަތް ކުރާ، އިސްލާމްދީނަށާއި ޤައުމުދެކެ ލޯބިވާ، ހެޔޮ ވިސްނުމުގެ ބޭނުން ހިފާ ދަރިވަރުންތަކެއް އުފެއްދުމެވެ. ސްކޫލްގެ އަމާޒަކީ ކުދިންނަށް އަޅާލާ، ރައްކާތެރި، ރިވެތި އަޚްލާޤީ ސިފަތައް ދަސްކޮށްދޭ މާހައުލެއްގައި ޒަމާނީ ތަޢުލީމް ފޯރުކޮށްދިނުމަށާއި، އިސްލާމްދީނަށާއި ދިވެހި ޤައުމުދެކެ ލޯބިވާ ދަރިންތަކެއް އުފެއްދުމެވެ. މި ސްކޫލުގެ ބިންގާ އެންމެ ފުރަތަމަ އެޅިގެންދިޔައީ ""މަކްތަބުއްޞަބާޙް"" ގެ ނަމުގައި 19 އޮގަސްޓް 1974 ވީ ހޯމަ ދުވަހުގައެވެ.