ސްކޫލް ތަޢާރަފު

ގެމަނަފުށީގެ ރައްޔިތުން ހިންގަމުން އައި ދަނޑިފަނުގެ މަދުރަސީ ތަޢުލީމަށް ރަސްމީ ހައިސިއްޔަތެއް ލިބުނީ 1980 ވަނަ އަހަރުގެ ޖޫން މަހުގެ 30 ވަނަ ދުވަހު މިނިސްޓްރީ އޮފް އެޑިޔުކޭޝަނުގައި "" ގެމަނަފުށީ މަކުތަބު "" ގެ ނަމުގައި އޭރު ރަށު އޮފީހުގެ ގޯތިތެރޭގައި ހިންގި މަކުތަބު، ރަޖިސްޓްރީ ކުރެވުނު ހިސާބުންނެވެ. ގެމަނަފުށީ ރަށު އޮފީސް ގޯތިތެރޭގައި ގެމަނަފުށީ މަކުތަބުގެ ނަމުގައި ހިންގަމުން އައި މި ސްކޫލް މިހާރު ހުރި ސަރަހައްދަށް ބަދަލުވީ 1990 ވަނަ އަހަރުގައެވެ. ޚާއްޞަ ކުލާސްތަކަށް ބައިކުރެވިފައިވާ ކުލާސްތައް ގްރޭޑް ސިސްޓަމަށް ބަދަލުވެގެން ދިޔައީ 1991 ވަނައަހަރުގައެވެ. އަދި ރައްޔިތުންގެ މަކުތަބެއްގެ ގޮތުގައި މި ސްކޫލް ހިންގަމުން އައިސް 1995 ވަނަ އަހަރުގެ ފަހުކޮޅުގައި ރަސްމީގޮތުން ސަރުކާރު ސްކޫލަކަށް ބަދަލުވިއެވެ. އަދި މަކުތަބުގެ ނަމުން ގެމަނަފުށީ ސްކޫލަށް ބަދަލުކުރެވުނެވެ. ސަރުކާރުގެ ސްކޫލެއްގެ ގޮތުގައި ހިންގަން ފެށުމުން އަހަރަކަށްފަހު އަހަރެއް ދިޔައީ ސްކޫލަށް ކުރިއެރުމާއި، ޤާބިލް އެދުރުން އިތުރުވަމުންނެވެ. ނަތީޖާއަކަށްވީ ދުވަހެއް ދުވަހަކަށް ސްކޫލުން ދަރިވަރުންނަށް ފޯރުކޮށްދޭ ތަޢުލީމުގެ ފެންވަރު ރަނގަޅުވެ، މުޅިރަށަށްވެސް ޢިލްމީ ދަންމަރުގެ އަލިކަން އުޖާލާވެގެން ދިއުމެވެ. 2004 ވަނަ އަހަރުގައި ބެލެނިވެރިންނާއި، ރައްޔިތުން ގުޅިގެން ސެކަންޑަރީ ތަޢުލީމް ދެވެން ފެށުނެވެ. 2006 ވަނަ އަހަރު ފުރަތަމަ ފަހަރަށް ޖީސީއީ އޯލެވެލް އިމްތިހާނު ހަދަންފެށުނެވެ. ޤާބިލް ޓީޗަރުންނާއި، ހިންގުންތެރި އިސްވެރިންގެ ހިތްވަރާއި، އެހީތެރި ބެލެނިވެރިންގެ މިންނަތާއި، ކިޔަމަންތެރި ދަރިވަރުން ގަދައަޅާކުރި މަސައްކަތްކުރުމުގެ ސަބަބުން ތަޢުލީމީގޮތުންނާއި، އިތުރު ހަރަކާތްތަކުން ސްކޫލަށް ދަނީ ކުރިއެރުން ލިބެމުންނެވެ.