ސްކޫލް ތަޢާރަފު

ދިވެހިރާއްޖޭގެ ރަސްމީ ތަޢުލީމުގެ ފެށުންކަމުގައިވާ މަޖީދިއްޔާ ސްކޫލް އެންމެ ފުރަތަމަ ވުޖޫދުވެގެން އައި 19 އޭޕްރީލް 1927 ގައި "" މަަަދަރުސަތުއްޞަލާޙިއްޔާ"" ގެ ނަމުގައެވެ. މި މަދަރުސާއަކީ އޭރު ރާއްޖޭގެ ބޮޑުވަޒީރު އަބްދުލް މަޖީދު ރަންނަބަޑޭރި ކިލެގެފާނުގެ އިސްނެންގެވުމާއެކު ކީރިތި މަހާރަދުން އައްސުލްޠާން މުޙައްމަދު ޝަމުސުއްދީން (3) ބިނާ ކުރެއްވި މަދަރުސާއެކެވެ.ފަޟީލަތުއްޝައިޚް ހުސެއިން ޞަލާޙުއްދީނުގެ ބެއްލެވުމުގެ ދަށުން ޝެއިޚް ރުޝްދީގެ މުރުޝިދުކަމުގެ ދަށުން ޢިލްމު އުނގަންނައިދެއްވަން ފެއްޓެވި މި މަދަރުސާ އަލުން އިމާރާތް ކުރައްވައި 6 ޖޫން 1928 ގައި ""މަދަރުސަތުއް ސަނިއްޔާ""ގެ ނަމުގައި ހުޅުވިގެން ދިޔައެވެ. އޭގެ 19 އަހަރު ފަހުން އަލްއަމީރު މުޙައްމަދު އަމީން ދީދީ ދިވެހި ދައުލަތް ހިންގެވުމާއި ހަވާލުވެ ވަޑައިގެންނެވުމާއެކު 6 އޭޕްރީލް 1947ގައި، ޢަބްދުލްމަޖީދު ރަންނަބަނޑޭރި ކިލެގެފާނަށް ނިސްބަތްކުރައްވާ މަދަރުސާގެ ނަން ""މަދަރުސަތުލް މަޖީދިއްޔާ""ގެ ނަމަށް ބަދަލުކުރެއްވިއެވެ.