ސްކޫލް ތަޢާރަފު

އަލްމަދްރަސަތުލް ޢަރަބިއްޔަތުލް އިސްލާމިއްޔާއަކީ ދިވެހިރާއްޖޭގައި ހުރި ޢަރަބި މީޑިއަމަށް ތަޢުލީމުދޭ ހަމަ އެކަނި މަދަރުސާއެވެ. މިއީ މިނިސްޓްރީ އޮފް އެޑިޔުކޭޝަންގެ ދަށުން ހިނގަމުންދާ ޢަރަބި އިސްލާމީ ތަޢުލީމުދޭ ސަރުކާރުގެ ސްކޫލެކެވެ. މި މަދަރުސާގެ މައިގަނޑު އަމާޒަކީ، ދިވެހި ސަރުކާރުގެ ތައުލީމީ ސިޔާސަތާ އެއްގޮތަށް، ޢަރަބި އިސްލާމީ ތަޢުލީމުދީ، ގައުމީ މަންހަޖު ތަންފީޒުކޮށް ދަރިވަރުންނަށް ތައުލީމާއި ތަރުބިއްޔަތު ދިނުމެވެ. މި މަދަރުސާގައި ޕްރައިމަރީ ގްރޭޑު 1 ން ފެށިގެން މަތީ ސެކަންޑަރީ ގްރޭޑް 12 އާއި ހަމައަށް ދަރިވަރުންނަށް ތައުލީމު ދެވެއެވެ. މި މަދަރުސާގައި ތަޢުލީމު ދެވެނީ މިޞުރުގެ އަލްއަޒްހަރު ޔުނިވާސިޓީގެ މުޤައްރަރު ތަކާއި އެއްގޮތަށެވެ. އަދި ދިވެހިރާއްޖޭގެ ޤައުމީ ސިލަބަހަށް ދިވެހި ބަހާއި އަދި ޕްރައިމަރީ ގްރޭޑް ތަކުގެ ބައެއް މާއްދާތައް ކިޔަވާދެވެއެވެ. މީގެ އިތުރުން އިނގިރޭސި ބަސް ކިޔަވައިދެނީ ކެމްބްރިޖް ޔުނިވަރސިޓީގެ ސިލަބަހަށެވެ. އެހެންކަމުން ގްރޭޑް 10 ގެ ދަރިވަރުން ކެމްބްރިޖްގެ އޯލެވެލް އައި.ޖީ.ސީ.އެސް.އީ އަދި އެސް.އެސް.އީ ދިވެހި އަދި ޢަރަބިބަހުގެ އިމްތިޙާނު ހަދައެވެ. އަދި ގްރޭޑް 12 ގެ ދަރިވަރުން ހަދާ ޝަހާދާ ޘާނަވިއްޔާގެ އިތުރުން އޭލެވެލް ގެ އިގިރޭސި ސީ.އޭ.އީ އަދި އެޗް.އެސް.އީ ދިވެހި އަދި ޢަރަބިބަހުގެ އިމްތިޙާނު ހަދަމުންގެންދެއެވެ.