3 ވަނަ ޔުނެސްކޯ ވޯލްޑް އޯޕަން އެޑިޔުކޭޝަނަލް ރިސޯސަސް (އޯ.އީ.އާރު) ކޮންގްރެސްގައި ދިވެހިރާއްޖެއިން ބައިވެރިވެއްޖެއެވެ. 
ދިވެހިރާއްޖޭގެ ފަރާތުން މި ކޮންގްރެސްގައި ބައިވެރިވެ ވަޑައިގެންނެވީ ސްޓޭޓް މިނިސްޓަރ ޑރ. ޢަބްދުއްލަޠީފް މުޙައްމަދުއެވެ. 
މިއީ ދުނިޔޭގެ އެކި ކަންކޮޅުތަކުން ތަޢުލީމީ ދާއިރާގައި މަސައްކަތްކުރައްވާ އިސްބޭފުޅުން އެއްތަނަކުން ބައްދަލުވެ، ޝާމިލު ތަޢުލީމީ ނިޒާމުތައް ބައްޓަންކުރުމަށްޓަކައި އާޓިފިޝަލް އިންޓެލިޖެންސް އާއި އެހެނިހެން ޙައްލުތައް ހޯދުމާ ގުޅޭގޮތުން މަޝްވަރާކުރުމަށް ބާއްވާ ކޮންގްރެސްއެކެވެ.  2 ދުވަހުގެ މުއްދަތަކަށް ކުރިއަށްދިޔަ މި ކޮންގްރެސްގައި ދުނިޔޭގެ އެކި ކަންކޮޅުތަކުން 500 އަށް ވުރެ ގިނަ ބޭފުޅުން ބައިވެރިވެ ވަޑައިގެންނެވިއެވެ. 
މި ކޮންގްރެސްގައި ޓެކްނޮލޮޖީއާއި އޯޕެން އެޑިޔުކޭޝަނަލް ރިސޯސަން މެދުވެރިކޮށް ޝާމިލު، ދެމެހެއްޓެނިވި ތަޢުލީމީ ނިޒާމުތައް ބައްޓަންކުރުމާ ގުޅޭގޮތުން ހައި ލެވެލް ޕެނަލްތަކާއި ބްރޭކްއައުޓް ސެޝަންތަކުގެ އިތުރުން ކަމާގުޅޭ މާހިރުންގެ މަޝްވަރާ ބައްދަލުވުންތައް ކުރިއަށްދިޔައެވެ. 
މި ކޮންގްރެސްގައި ކުރިއަށްދިޔަ މިނިސްޓީރިއަލް ޕެނަލް ޑިސްކަޝަންއެއްގައި ޑރ. ލަޠީފް ވަނީ ބައިވެރިވެ ވަޑައިގެންފައެވެ. މި ޕެނަލް ޑިސްކަޝަން ކުރިއަށް ދިޔައީ ތަޢުލީމީ ދާއިރާގެ ކުރިމަގު ބައްޓަންކުރުމާ ގުޅޭ މުހިންމު މަޝްވަރާތަކުގެ މައްޗަށް ބިނާކޮށެވެ.