ސްކޫލް ތަޢާރަފު

ކުރިނބީގައި އެންމެ ފުރަތަމަ ތަޢުލީމުދޭ މަދަރުސާއެއް ރަޖިސްޓްރީ ކުރެވުނީ 19 މެއި 1969 ވަނަ އަހަރުއެވެ. މަކްތަބުލް ޖަލާލިއްޔާގެ ނަމުގައި އުފެދިގެން އައި މި މަކްތަބުގެ އުމުރުން 50 އަހަރު ފުރޭ ރަންޔޫބީލް ފާހަގަކުރަމުންދާއިރު ތަފާތު ގިނަގުނަ ކުރިއެރުން ތަކެއް ހޯދިފައިވެއެވެ. މިހާރު އަޅުގަނޑުމެން މިތިބި ސްކޫލަކީ 1994 ވަނަ އަހަރު، ވީ.އެސް.އޯގެ ހިލޭއެހީގެ ދަށުން ހދ. ކުރިނބީ ރައްޔިތުން ބިނާކޮށްފައިވާ ސްކޫލެކެވެ. އެންމެ ފުރަތަމަ މިސްކޫލް ހުޅުވިގެން ދިޔައީ ކުރިނބީ މަކްތަބުގެ ނަމުގައި 4 އޮކްޓޫބަރ 1995 ވަނަ އަހަރެވެ. 2000 ވަނަ އަހަރު ސަރުކާރު ސްކޫލަކަށް ބަދަލުކޮށް ކުރިނބީގެ މަކްތަބުގެ ނަން ކުރިނބީ ސްކޫލަށް ބަދަލުކުރެވުނެވެ. 2006 ވަނަ އަހަރު ގްރޭޑް 8 އުފައްދައި ސެކަންޑަރީ އަށް ކިޔަވައިދޭ ސްކޫލަކަށް މިސްކޫލް ހަމަޖެހުނެވެ. އަދި 2007 ވަނަ އަހަރު ސްކޫލް ބޯޑާއި ޕީ.ޓީ.އޭ އުފައްދާފައިވެއެވެ. އަދި 2008 ވަނަ އަހަރު މިސްކޫލް ޖީ.ސީ.އީ އޯލެވެލް ސެންޓަރަކަށް ބަދަލުކުރެވި ފުރަތަމަ ފަހަރަށް ޖީސީއީ އޯލެވެލް އިމްތިހާނުގައި ބައިވެރިވާން ފެށުނެވެ. ފާއިތުވެދިޔަ އަހަރު ފިޔަވާ 2016 އިން ފެށިގެން 2020-2021 އާއި ހަމައަށް މިސްކޫލްގެ ސާނަވީ އިމްތިހާނު ނިންމާ ދަރިވަރުންގެ ނަތީޖާ 60 އިން ސައްތައަށްވުރެ މަތީގައި ހިފެހެއްޓުނެވެ. ފާއިތުވެދިޔަ އަހަރު 5 މާއްދާއިން މަތިން ދަރިވަރުން ފާސްވި އިންސައްތައަކީ 50 އެވެ. އަދި 2020-2021 ވަނަ އަހަރު ފުރަތަމަ ފަހަރަށް ޤައުމީ ގަދަ 10 ގައި މިސްކޫލްގެ ދަރިވަރަކު ހިމެނުނެވެ. އަދި 2022-2023 ވަނަ އަހަރު ޤައުމީ ގަދަ 10 ގެ 3 ވަނަގައި މިސްކޫލްގެ ދަރިވަރަކު ހިމެނުނެވެ. ސްކޫލްގައި ކިޔަވައިދެނީ ކޮމްބައިންޑް ސްޓްރީމަށެވެ.