ސްކޫލް ތަޢާރަފު

މިސްކޫލަކީ 1939މ ވަނަ އަހަރު މަކްތަބުއްޞަލާޙުގެ ނަމުގައި ހިނގަމުންއައި ސްކޫލެކެވެ. މަކްތަބުއް ޞަލާޙުގެ ބިންގާ އެޅުއްވީ އޭރު ނައިވާދޫގެ ކަތީބް އަލްފާޟިލް ޢަލީ ޤާސިމް އެވެ. އެއަށްފަހު 1969މ ވަނަ އަހަރުގެ މެއި 17 ވަނަ ދުވަހު މިސްކޫލް ނައިވާދޫ މަކްތަބް މިނަމުގައި ރަޖިސްޓްރީ ކުރެވިގެން ހިނގަމުންދިޔައެވެ. އަދި ކިޔަވައިދޭ ޢިމާރާތެއްގެ ދަތިކަމުން 1984 ވަނަ އަހަރު ރައްޔިތުންގެ އަމިއްލަ ޚަރަދުގައި ޒުވާނުންގެ މަރުކަޒެއްއަޅައި، އެ ޢިމާރާތުގައި ކިޔަވައިދެވުނެވެ. 1987 ވަނަ އަހަރު ފެބުރުއަރީ 15 އިން ފެށިގެން ޕްރައިމަރީ ފެންވަރަށް ހިނގާ ސްކޫލަކަށް މިސްކޫލް ހަމަޖެހުނެވެ. 1989 ޑިސެމްބަރ 29 ވަނަ ދުވަހު 3 ކްލާސްރޫމް ހިމެނޭ ހޯލްޢިމާރާތަކާއި ގުޅިގެން އޮފީހަކާއި ގުދަނެއް އަދި 3 ފާޚާނާ ހިމެނޭ ފާޚާނާ ބަރިއެއްގެ ބިންގާ އެޅުނެވެ. މި އިމާރާތަކީ ސަރުކާރުން ތަކެތި ދީގެން ރައްޔިތުންގެ މަސައްކަތުން އަޅައިފައިވާ އިމާރާތެކެވެ. މި އިމާރާތް އިމާރާތްކޮށް ނިމުނީ 1991 ޑިސެމްބަރ 31 ގައެވެ. 1992 ވަނަ އަހަރު މިސްކޫލްގައި ޓީޗަރ ޓްރެއިނިންގ ހަދާފައިވާ ދެ ޓީޗަރުން ކިޔަވައިދޭން ފެށިއެވެ. މި އިމާރާތް ރަސްމިކޮށް ހުޅުއްވައިދެއްވީ، 1992 ސެޕްޓެމްބަރ 29 ގައި މިނިސްޓަރ އޮފް އެޑިއުކޭޝަން އަލްފާޟިލް ޢަބްދުﷲ ޙަމީދެވެ. އަދި 1993 ވަނަ އަހަރު މަކުތަބްގެ ނަމުގައި ބޭނުންކުރަމުންއައި ނަން ނައިވާދޫ ސްކޫލްގެ ނަމަށް ބަދަލުކުރެވުނެވެ. 2005 ވަނަ އަހަރުގެ އޯގަސްޓް މަހުގެ 1 ވަނަ ދުވަހުން ފެށިގެން މިސްކޫލް ސަރުކާރު ސްކޫލަކަށް ހަމަޖެހުނެވެ. 2006 ވަނަ އަހަރު ގްރޭޑް 8 އުފެދި ސެކަންޑަރީ އަށް ކިޔަވައިދޭ ސްކޫލަކަށް މިސްކޫލް ހަމަޖެހުނެވެ. އަދި 2008 ވަނަ އަހަރު މިސްކޫލް ޖީސީ އޯލެވެލް ސެންޓަރަކަށް ބަދަލުވެ، ފުރަތަމަ ފަހަރަށް މި ސްކޫލުގައި ޖީ.ސީ.އީ އޯލެވެލް އިމްތިހާން ބޭއްވުނެވެ. 2009 ވަނަ އަހަރު މިސްކޫލްގައި ސްކޫލްބޯޑް އުފައްދާފައިވެއެވެ.