ސްކޫލް ތަޢާރަފު

23 ޖޫން 1969 ގައި މަކްތަބުލް ހިދާޔާގެ ނަމުގައި ގާތްގަނޑަކަށް 180 ދަރިވަރުންނާއިއެކު، ބޯޑުއަޅާ ކުލާސް 1،2 ގެ ނަމުގައި ކިޔަވައިދޭން ފެށުނެވެ. އެދުވަސްވަރު ރަށުން ލިބޭ އެންމެ މަތީ ތަޢުލީމަކީ ބޯޑުއަޅާ ކްލާސް 2 ނިންމުމެވެ. މަކުނުދޫގެ ތަޢުލީމީ ޙަޔާތް މިގޮތުގައި ދުވަސްތަކެއް ވޭތުކުރުމަށްފަހު 1981 ވަނަ އަހަރު ޕްރައިމަރީ ޓީޗަރެއްގެ ޚިދުމަތް ލިބެން ފެށުމާއި ގުޅިގެން ދިވެހި ރާއްޖޭގެ ޤައުމީ މުޤައްރަރު ތަޢާރަފް ކުރެވުނެވެ. އަދި 1994 ގައި ގްރޭޑް 6 އުފެދި މެދުމަދުރަސީ ފެންވަރަށް ކިޔަވައިދޭން ފެށުނެވެ. 2004 ވަނަ އަހަރު މި ސްކޫލްގައި ސާނަވީ ކޮމާސް ސްޓްރީމް ފަށާ، 2006 ގައި ފުރަތަމަ ފަހަރަށް ސްކޫލްގެ ދަރިވަރުން އޯލެވެލް އިމްތިހާނާއި އެސް،އެސް،ސީ އިމްތިޙާނުގައި ބައިވެރިވެފައިވެއެވެ. 2014 ވަނަ އަހަރު މި ސްކޫލުގައި އޭލެވެލް އަށް ކިޔަވައިދޭން ފެށުނު އަދި އޭލެވެލް ކުރިޔަށް ގެންދެވޭ ވަރަށް 2015 ވަނަ އަހަރާއި 2016 ވަނަ އަހަރު ކުދިން ލިބިފައި ނުވާތީ 2016 ވަނަ އަހަރު އޭލެވެލްއަށް ކިޔަވައިދިނުން މެދުކެނޑިގެންދިޔައެވެ. 2015 ވަނަ އަހަރު މިސްކޫލުގައި ދަސްވާރު ޕްރޮގްރާމާއި ބީޓެކް ސްޓްރީމް ފެށިގެންދިޔައެވެ. އައު މަންހަޖު ތަޢާރަފް ވުމާއި ގުޅިގެން 2015 ވަނަ އަހަރު މިސްކޫލްގެ ކީ ސްޓޭޖް 1 ކަމުގައިވާ 1،2،3 ގެ ދަރިވަރުންނަށް ކިޔަވައިދީފައިވަނީ އައު މަންހަޖަށެވެ. އަދި 2016 ވަނަ އަހަރުން ފެށިގެން ކީ ސްޓޭޖް 2 ކަމަށްވާ 4،5،6 ގެ ދަރިވަރުންނަށް އައު މަންހަޖަށް ކިޔަވައިދޭން ފެށުނެވެ. އަދި 2017 ވަނަ އަހަރާއި 2018 ވަނަ އަހަރު ކީ ސްޓޭޖް 3އަށް ކިޔަވައި ދެވިފައިވެއެވެ. އަދި 2019 ވަނަ އަހަރުވެސް ކީ ސްޓޭޖް1 އިން 4 އަށް އުނގަންނައި ދީފައި ވެއެވެ. މަކުނުދޫ ސްކޫލަކީ 366 ދަރިވަރުންނާއި 48 މުވައްޒަފުންނާއިއެކު ފައުންޑޭޝަން ސްޓޭޖުން ފެށިގެން ދަށު ޘާނަވީ (ގްރޭޑް10) އާއި ހަމައަށް ތަޢުލީމުގެ ދާއިރާގެ އެކި ފިޔަވަހި ކަޑަތުކޮށް އުޖާލާ މުސްތަޤްބަލެއް ބިނާކުރުމަށް ގަދައަޅާ މަސައްކަތް ކުރަމުންދާ ސްކޫލެކެވެ. މީގެ އިތުރުން ޚާއްޞަ އެހީއަށް ބޭނުންވާ ދަރިވަރުންނަށް ތަމްރީންވެފައިވާ ޓީޗަރެއްގެ އެހީތެރިކަމާއިއެކު މިއަހަރު ވެސް ޚާއްޞަ އެހީއަށް ބޭނުންވާ ދަރިވަރުންނަށް ކިޔަވައިދިނުން ކުރިޔަށް ގެންދެވިފައިވާކަންވެސް ފާހަގަ ކޮށްލަމެވެ. މި ސްކޫލުގައި ސާނަވީގައި ކިޔަވައިދެނީ ކޮމްބައިން ސްޓްރީމާއި (އިސްލާމް، ދިވެހި، އިނގިރޭސި، ހިސާބު، ޤުރުއާން، ބައޮލޮޖީ، ކެމިސްޓްރީ، ބިޒްނަސް ސްޓަޑީޒް އަދި އެކައުންޓިންގ) ބީ-ޓެކް ސްޓްރީމެވެ.