ސްކޫލް ތަޢާރަފު

ބ. އަތޮޅުމަދަރުސާއަކީ ދިވެހި ސަރުކާރުން ރާއްޖޭގެ ރަށްރަށުގައި އަޅުއްވައި ދެއްވަން ފެއްޓެވި ސްކޫލްތަކުގެ ތެރެއިން އަޅާދެއްވި އެއްސްކޫލެވެ. ބ. އަތޮޅުމަދަރުސާގެ ނަމުގައި އެންމެ ފުރަތަމަ ސްކޫލެއް ހުޅުވުނީ ފާރޮށިގޭގައި ގައެވެ. މިސްކޫލް ހުޅުއްވައި ދެއްވީ 11 މާރޗް 1979 ގައި އޭރުގެ ރައީސުލް ޖުމްހޫރިއްޔާ އަލްއުސްތާޛް މަޢުމޫނު އަބްދުލްޤައްޔޫމެވެ. އޭގެ ފަހުން ޖަޕާނު ސަރުކާރުގެ ހިލޭ އެހީގެ ދަށުން ލިބުނު ބ. އަތޮޅުމަދަރުސާގެ އާޢިމާރާތް ބިންގާ އަޅުއްވައި ދެއްވީ 03 އޭޕްރީލް 1985 ގައި އޭރުގެ އެޑިޔުކޭޝަން މިނިސްޓަރ އަލްއުސްތާޛް މުޙައްމަދު ޒާހިރު ޙުސައިންއެވެ. ބ. އަތޮޅުމަދަރުސާގެ އައު ޢިމާރާތް ހުޅުއްވައި ދެއްވީ 21 ޖެނުއަރީ 1986 ގައި އޭރުގެ އެޑިޔުކޭޝަން މިނިސްޓަރ އަލްއުސްތާޛް މުޙައްމަދު ޒާހިރު ޙުސައިންއެވެ. މިއައު ޢިމާރާތް ލިބުނު ޢިރު ސްކޫލްގެ ތަޢުލީމީ ހާލަތު އޮތީ ވަރަށް ދަށު ދަރަޖާގައެވެ. 1986 ގެ ފަހުން މިމަދަރުސާގައި ގްރޭޑް 5 އާއި ހަމައަށް ކިޔަވައިދޭން ފެށުނެވެ. އެއަށްފަހު އަހަރަކު ގްރޭޑެއް އިތުރުވަމުން ގޮސް މިހާރު މިމަދަރުސާގައި ގްރޭޑް 10 އުފެދި އޯލެވެލް އިމްތިޙާނު ގެންދަނީ ހަދަމުންނެވެ. މީގެ އިތުރުން 2018 ވަނައަހަރު ވަނީ ބީޓެކް އޭލެވެލް އަށް ކިޔަވައިދޭން ފެށި ބީޓެކް އޭލެވެލް އިމްތިޙާނު ގައި ފުރަތަމަ ފަހަރަށް 2019 ވަނަ އަހަރު މިސްކޫލްގެ ދަރިވަރުން ވަނީ ބައިވެރި ވެފައެވެ. ބ. އަތޮޅުމަދަރުސާ ބޭނުންކުރަމުން ގެންދިޔަ ޔުނީފޯމާއި، ސްކޫލްގެ ލަވަ 2018 ވަނައަހަރުގެ ދިރާސީ އަހަރު ފެށުނުއިރު ބަދަލުކުރެވުނެވެ. މިސްކޫލްގެ ދިގު ތާރީޚްގައި ތަޢުލީމީ ރޮނގުންވަނީ ބޮޑު ކުރިއެރުންތަކެއް ހޯދާފައެވެ.