ސްކޫލް ތަޢާރަފު

އެންމެފުރަތަމަ މި ސްކޫލްގެ ނަމެއްގެ ގޮތުގައި ބޭނުންކޮށްފައިވަނީ މަކްތަބުލް ވަރުދާއެވެ. އޭގެ ފަހުން އޮމަދޫ މަކްތަބުގެ ނަމަށް ބަދަލުވެފައިވެއެވެ. އަދި އޮމަދޫ މަދަރުސާގެ ނަމަށް ބަދަލުވިއެވެ. މިހާރު ސްކޫލްގެ ނަމެއްގެ ގޮތުގައި ބޭނުންކުރަނީ އޮމަދޫ ސްކޫލްއެވެ. ސްކޫލްއުފެދިގެން އައިގޮތްކަމުގައި ލިޔެކިޔުންތަކުން ފެންނަންހުރި ގޮތް ތިރީގައިއެވަނީއެވެ. ރައްޔިތުންގެ ކަމެއްގެ ގޮތުގައި ވެރިކަމުގެ ފަރާތުން ކުޑަކުދިންނަށް ކިޔަވައިދޭން އދ އޮމަދޫގައި ފެށުނީ 1948 ވަނަ އަހަރުއެވެ. އެއީ މިހާރު ""ކުޅިބަލާގެ"" އެ ހުރިތާނގައި އޭރުހުރި މަޢުލޫދު ހަރުގޭގައެވެ. މިތަން ބައުވެ ކިޔަވައިދެވޭވަރު ނުވެގެން ""ދިލްކުޝާގޭ"" ގެ އިރުން ހުރި މީހުންދިރިނޫޅޭ އަމިއްލަމީހެއްގެ ދަނޑިފަނުން އަޅާފައިވާ ގެއެއް ކަމުގައިވާ ""އީސާގޭ"" ގައިވެސް ހައެއްކަ މަސްދުވަހު ކިޔަވައިދިނެވެ. ސަރުކާރުގެ އެންގެވުމުގެ މަތިން ރަށުގެ އިސްވެރިން އިސްވެ ތިބެ ރައްޔިތުން އިމާރާތްކުރި މަދަރުސާގައި ކިޔަވައިދޭން ފެށީ 1950 ގައެވެ. މިއީ ""ކަނީރުގޭ"" ހުޅަނގުން އޮތް ބިމުގައި ޢިމާރާތްކުރި މަދަރުސާއެކެވެ. މިތާނގެ ބޮޑުމިނަކީ 37 ފޫޓް 29 ފޫޓެވެ. 1950 ވަނަ އަހަރަކީ މަދަރުސާ ރަޖިސްޓްރީކޮށްގެން ފުރަތަމަ ކިޔަވައިދޭން ފެށި އަހަރެވެ. ސަރުކާރުން ތަކެތި ދެއްވައިގެން ރައްޔިތުންގެ މަސައްކަތާއިއެކު ޢިމާރާތްކުރި 03 ކިލާސްރޫމާއި އޮފީސް ހިމެނޭ އދ އޮމަދޫ ސްކޫލް ޢިމާރާތްކޮށް ހުޅުވީ 1990 ޖުލައި 15 ވަނަދުވަހުއެވެ. މިތަނުގެ ބޮޑުމިނަކީ 73 ފޫޓް 28 ފޫޓެވެ. މިތަން ހުރީ ޖަނަވަރީމަގުން ހުޅަނގުން އަމީނީ މަގުން ދެކުނުގައެވެ.