ސްކޫލް ތަޢާރަފު

މި ސްކޫލް އަކީ 01 މެއި 1982ވަނަ އަހަރު މިނިސްޓްރީ އޮފް އެޑިޔުކޭޝަންގައި ރަޖިސްޓްރީ ކުރެވިގެން ކޮމިޔުނިޓީ ސްކޫލެއްގެ ގޮތުގައި ދެއްވަދޫ އޮފީހުގެ އިމާރާތުގެ ތެރޭގައި ފުރަތަމަ ހިންގި ސްކޫލެކެވެ. އޭރު މި ސްކޫލުގެ ނަމަކީ، ""މަދަރުސަތުލް ސުލްޠާން މުޙައްމަދު"" އެވެ. ވަކި އިމާރާތެއްގެ ގޮތުގައި 1985 ވަނަ އަހަރުގެ އޭޕްރީލް 5 ގައި ސްކޫލުގެ ބިންގާ އެޅުނު މި ސްކޫލް ހުޅުވުނީ 1991 ވަނަ އަހަރުގެ ޑިސެމްބަރ 12 ގައެވެ. ސަރުކާރު ސްކޫލަކަށް ބަދަލުވީ، ކޮމިޔުނިޓީ ސްކޫލުތައް ސަރުކާރުގެ ސްކޫލަތަކަށް ބަދަލުކުރުމުގެ ސިޔާސަތުގެ ދަށުން 2007 ވަނަ އަހަރުގެ ތެރޭގައެވެ. 2017 ވަނަ އަހަރުގެ ސެޕްޓެމްބަރ 17 ގައި ސުލްޠާން މުޙައްމަދު ސްކޫލުގެ ނަމަށް ބަދަލުކުރެވުނު މި ސްކޫލަކީ ދިވެހިރާއްޖޭގެ ރަސްކަމުގެ ތާރީޚާއި ވަރަށްބޮޑަށް ގުޅިފައިވާ ތާރީޚީ ސްކޫލެކެވެ. ދިވެހިރާއްޖޭގެ ރަސްކަމުގެ ތަޚްތުގައި 9 އަހަރު ވަންދެން ރަސްކަން ކުރައްވާ، ދިވެހި ތާރީޚުގައި ރަންއަކުރުން އެބޭފުޅެއްގެ ނަންފުޅު ލިޔެވިފައިވާ އައްސުލްޠާން މުޙައްމަދު ( ދެއްވަދޫ ރަސްގެފާނުގެ ) ނަންފުޅުން ނަންދެވިފައިވާ ސްކޫލެކެވެ.