ސްކޫލް ތަޢާރަފު

ހުވަދޫ ސްކޫލަކީ ދިވެހިވަންތަކަން ހުރި، ބޭނުންތެރި، ޒިންމާދާރު މުވާޠިނުންތަކެއްގެ ޤައުމެއް ބިނާކުރުމަށާއ،ި އިސްލާމީ އުޞޫލްތަކުގެ މަތިން ތަޢުލީމު ކުރިއެރުވުމަށާއ،ި އިތުރު ޙަރަކާތްތަކުގެ ރޮނގުން ފަޚުރުވެރި މަޤާމު ލިބިދޭ އުނގެނުމުގެ ވެއްޓަކާއ،ި ޢިލްމީ ޝައުޤުވެރިކަން އުފެއްދުމަށް ހިންގޭ ސަރުކާރު ސްކޫލެކެވެ. މިސްކޫލް އެންމެ ފުރަތަމަ ހިނގަމުން އައިސްފައިވަނީ ތަފާތު ދެރަށެއްގައި ތަފާތު ދެ ސްކޫލުއެއްގެ ގޮތުގައިއެވެ. އެއީ 27 ޑިސެމްބަރ 1976 ދުވަހު ގދ.ފަރެހުގައި ހުޅުވިގެންދިޔަ ""މަކްތަބުލް ޖިހާދު"" އާއި 23 ޖޫން 1981 ދުވަހު ގދ.މާތޮޑާގައި ހުޅުވުނު ""މާތޮޑާ ސްކޫލް"" އެވެ. މި ދެސްކޫލް އެއްފުރާޅެއްގެ ދަށަށް ބަދަލުކޮށް ""ހުވަދޫ ސްކޫލު""ގެ ނަމުގައި ހުޅުވިގެން ދިޔައީ 11 މެއި 2003 ގައެވެ. މިސްކޫލުގެ މޮޓޯއަކީ ""މިއަދުގެ ކިޔަވާކުދިން މާދަމާގެ ލީޑަެރުން"" އެވެ. މިސްކޫލުގެ އަމާޒަކީ ކާމިޔާބު ސްކޫލަކަށްވުމުގެ އަސާސީ ސިފަތަށް ކަމަށްވާ ތަޢުލީމީ ކާމިޔާބީއާމެދު މުވައްޒަފުންގެ ހިތްތަކުގައި އޮންނަ ތަސައްވުރާއި، އިސްމުވައްޒަފުންގެ ޓީމްގެ އިސްނެގުމާއި ބައިވެރިވުން ހަރުދަނާ ނިޒާމެއްގެ ތެރެއިން ހިންގުމާއި، މުވައްޒަފުން ބިނާކޮށް ފަންނީ ޤާބިލުކަން އިތުރުކޮށް ދިނުމާއިއެކު، ދަރިވަރުންގެ ޢިލްމީ ކުރިއެރުން ގިނަގިނައިން ބެލެމެވެ. މިއަމާޒަށް ވާސިލް ވުމަށްޓަކައި ފަންނީ މުވައްޒަފުންގެ އެއްބާރުލުމާއިއެކު ދަރިވަރުންނަށް އެންމެ ބޭނުންތެރި ތަޢުލީމީ ފްރޮގްރާމްތަކެއް ހުށަހަޅައިގެން ދަރިވަރުންގެ އުގަންނައިދިނުން އިތުރަށް ހަރުދަނާ ކުރުމަށް މަސައްކަތް ކުރެވެމުންދެއެވެ. މިސްކޫލުގައި ފައުންޑޭޝަން ސްޓޭޖުން ފެށިގެން ކީސްޓޭޖް 4 ކަށް ދަރިވަރުން ތަޢުލީމް ހާސިލް ކުރެއެވެ . މިސްކޫލުގައި 2017 ވަނަ އަހަރުން ފެށިގެން ވަނީ ކޮމްބައިންޑް ސްޓްރީމް ތައާރަފް ކޮށްފައެވެ. މިސްޓްރީމް އެކުލަވާފައި ވަނީ ސައިންސް ސްޓްރީމާއި ބިޒްނަސް ސްޓްރީމްގެ ތެރެއިން ދަރިވަރުންނަށް އެންމެ ބޭނުންތެރި މާއްދާތައް ހިމަނައިގެންނެވެ. މީގެ އިތުރުން މިސްކޫލުގައި ބީޓެކް ހޮސްޕިޓެލިޓީވެސް ކިޔަވައި ދެއެވެ.