ސްކޫލް ތަޢާރަފު

ފޭދޫ ސްކޫލްގެ އެންމެ ފުރަތަމަ ފެށުމަކީ، ފޭދޫގައި ތައުލީމީ ދަރިންތަކެއް އުފައްދާ، ރަނގަޅު މުޖުތަމައުއެއް ބިނާކުރުމުގެ މަގުސަދުގައި 1950 ގެ އަހަރު ތަކުގެ ތެރޭގައި ދަނޑިފަނުން ސ. ގަމުގައި ބިނާކުރެވުނު މަދަރުސާއެވެ. ސ ގަމުގައި ހިނގަމުން އައި މި މަދަރުސާ ފޭދޫ އަށް ބަދަލު ކުރަންޖެހުނީ، އިނގިރޭސީން ގަމަށް ފޭބުމާ ގުޅިގެން، ގަމު ރައްޔިތުން ފޭދޫ އަށް ބަދަލުކުރުމާ ގުޅިގެންނެވެ. ޢިމާރާތަށް ބޮޑެތި ބަދަލުތަކެއް އައިސްފައިވީ ނަމަވެސް، މިހާރުވެސް ފޭދޫ ސްކޫލް ހިނގަމުން މިދާ ބިމަކީ، އޭރު ގަމުގައި ހުރި މަދަރުސާގެ ބަދަލުގައި، އިނގިރޭސީން ފެދޫގައި ބިނާކޮށްދިން މަދަރުސާ ހުރި ބިމެވެ. އެންމެ ތިން މުދައްރިސުންނާއިއެކު ކަތީބު ދޮންރަހާގެ މަސްއޫލުވެރިކަމުގެ ދަށުގައި ފޭދޫގައި ފުރަތަމަ ސުކޫލު ހިންގަންފެށުނީ މަދުރަސަތުލް މަޒާހިރާގެ ނަމުގައެވެ. އޭރު ސުކޫލުގައި ކިޔަވައިދެވުނު މާއްދާ ތަކަކީ ހިސާބު ދީނިއްޔާތު އަދި ކީރިތި ޤުރުއާނެވެ. މުދައްރިސުންގެ ގޮތުގައި މަސައްކަތް ކުރައްވާފައިވަނީ އަލްމަރުހޫމް ގެދަރު ހުސައިން މަނިކުފާނާއި އަލްމަރުހޫމް ރޯޒްވިލާ އަހުމަދު ޒާފިރާއި އަދި ލައިނޫންފަރުގޭ އަލްމަރުހޫމު އަހުމަދު މަނިކުފާނެވެ. މަދުރަސަތުލް މަޒާހިރާގެ ނަމުގައި ސުކޫލު ހިންގަމުން ދަނިކޮށް ތަފާތު ސަބަބު ތަކާއި ގުޅިގެން އެކި ދުވަސްވަރު ސުކޫލުގެ ނަމަށް ބަދަލު އައިކަމުގައިވިނަމެސް އޭރު ރަށުގެ ތަޢުލީމީ ބޭފުޅުންގެ ބުރަމަސައްކަތާއެކު، އެކިނަންނަމުގައި، މެދުނުކެޑި ސްކޫލް ހިންގަމުން އައިސް، ސ. ފޭދޫ ފެންފުށި އަލްމަރުހޫމް މުހައްމަދު ވަހީދުގެ އިސްނެންގެވުމާއިއެކު، ސ. ފޭދޫ ޕޫލްކިނާރާ މުހައްމަދު ލުތުފީ ގެ މަސްއޫލުވެރިކަމުގައި ގައި 18 ޖުލައި 1972 ވަނަ އަހަރު ފޭދޫ ސްކޫލު މިނިސްޓްރީ އޮފް އެޑިއުކޭޝަންގައި ރަޖިސްޓްރީ ކުރެވި، ރަސްމީ މަދަރުސާއެއްގެ ޙައިސިއްޔަތު ލިބިގެންދިޔައެވެ. ޕޫލްކިނާރާ މުޙައްމަދު ލުޠުފީގެ މަސްއޫލުވެރިކަމުގައި ހިނގަމުން އައި ސްކޫލް، ސ.އަތޮޅު ކޮމިޓީގެ ރައިސްގެ މަސްއޫލުވެރިކަމަށް ބަދަލުވެފައިވަނީ 11 ޖޫން 1974 ގައެވެ. އަދި ސ.އަތޮޅު ކޮމިޓީގެ ރައިސްގެ މަސްއޫލުވެރިކަމުން، ކަތީބު / ފޭދޫ އޮފީހުގެ މަސްއޫލުވެރިކަމަށް 29 ޖޫން 1980 ގައި ވަނީ ބަދަލުވެފައެވެ. މިބަދަލާއެކު ސްކޫލްގެ ނަން މަކްތަބުލް އިސްލާމީ އިން ފޭދޫ ސްކޫލަށް ބަދަލުކޮށް ސުކޫލު ހިންގުމުގެ ޒިންމާ، ސ. ފެދޫ އޯކިޑްމާގެ އަހުމަދު ފުއާދާއި ހަވާލުކުރުވުނެވެ. އަދި 27 މާރޗް 1982 ގައި ސުކޫލުގެ ފުރަތަމަ ބެޖް/ދިދަ އަދި ޔުނިފޯމް ރަސްމީކޮށް ތައާރަފުކުރެވި މިނިސްޓްރީ އޮފް އެޑިޔުކޭޝަންގައި ރަޖީސްކޮށް ބޭނުންކުރަންފެށުނެވެ. ޒަމާނީ ތައުލީމު ފޯރުކޮށްދޭ މަދަރުސާއަކަށް މި ސްކޫލް ހެދުމުގެ މަގުސަދުގައި ފޭދޫގެ ވިޔަފާރިވެރިން ކަމުގައިވާ ސ. ފޭދޫ އަޅިވިލާގެ އިބްރާހީމް ލަތީފާއި، ސ. ފޭދޫ އޯކަމް މޫސާ އަލީއާއި، ސ. ފޭދޫ، ބްރައިޓްވިލާ މޫސާ އަހުމަދު އަދި ސ. ފޭދޫ ވާރުގޭ ހަސަންތައްހާން އިސްނައިގެން، ފޭދޫ އޮފީހާއެކު ކުރެވުނު މަޝްވަރާގެ މަތިން، ފޭދޫ ސްކޫލްގެ ހުރިހާކަމެއް ހިންގާ ބެލެހެއްޓުން 15 ޖެނުއަރީ 1990 އިން ފެށިގެން މިދެންނެވި 4 ބޭފުޅުންނާ ހަވާލުކުރެވި ހިންގަންފެށުނެވެ. އެއާއެކު ސްކޫލު ހިންގުމުގެ ހުރިހާ ހަރަދާއި ސުކޫލަށް ބޭނުންވާ މުދައްރިސުންނާއި ނާޒިރުން ހޯދުމުގެ ޒިންމާ މި 4 ބޭފުޅުން ނެންގަވައި، ސްކޫލް ހިންގުން މުޅިން އައު ޒަމާނީ އުސޫލުތަކަށް ބަދަލުކޮށް، ޢިމްރާނީ ގޮތުންނާއި ތަޢުލީމީ ގޮތުން ސްކޫލަށް ބޮޑެތި ކުރިއެރުން ތަކެއް ވަނީ ގެނެސްދީފައެވެ. ރައްޔިތުންގެ ސްކޫލެއްގެ، ރަޖިސްޓްރީވެގެން ހިނގަމުން އަންނަތާ 20 އަހަރުފަހުން، ފޭދޫ ސްކޫލް ސައްތައިން ސައްތަ ސަރުކާރުން ހިންގާ ސްކޫލަކަށް ބަދަލުވެ، ސްކޫލްގެ މަސްއޫލުވެރިކަން މިނިސްޓްރީ އޮފް އެޑިޔުކޭޝަނަށް ބަދަލުވެފައިވަނީ، 01 މާރިޗް 1992 ގައެވެ. އެތާރީޚުން ފެށިގެން، އޭރު ސްކޫލްގައި ތިބި ހުރިހާ މުވައްޒަފުން ސަރުކާރުގެ މުވަޒަފުންފެ ގޮތުގައި ބަދަލުވެ، މިނިސްޓްރީ އޮފް އެޑިޔުކޭޝަނުގެ މަސްއޫލުވެރިކަމުގެ ދަށުން ހިންގަން ފެށުނެވެ. އެންމެ ތިން މުދައްރިސުންނާއެކު ހިންގަން ފެށުނު ފޭދޫސްކޫލަކީ މިއަދު އައްޑު އަތޮޅާއި މުޅި ރާއްޖެއިންވެސް ތައުލީމީ ގޮތުން ފާހަގަކުރެވޭ އެއްސުކޫލެވެ. ކުޅަދާނަ އެތައް ބޭފުޅުންގެ މޭސްތިރިކަމުގެ ދަށުން ތަފާތު ގޮންޖެހުންތަކާއި، ދިމާވި ދަތި އުނދަގޫ ތައް ގިރާކުރަމުން އެންމެ ފިޔަވަޅެއްވެސް ފަހަތައް ނުޖެހި ކުރެވުނު ބުރަމަސައްކަތުން މިއަދު ފޭދޫސްކޫލުވަނީ ކާމިޔާބީގެ ހަރުފަތުގައި ފައިތިލަ ސާބިތުކޮށްފައެވެ.