ފާއިތުވެދިޔަ އަހަރުގެ ތަޢުލީމީ ދާއިރާ ކުރިއަށްދިޔަ ގޮތާ ބެހޭގޮތުން މަޝްވަރާކުރުމަށް "އެނުއަލް ޖޮއިންޓް އެޑިޔުކޭޝަން ސެކްޓަރ ރިވިއު" (ޖޭ.އެސް.އާރު) ކަލްމިނޭޝަން ސަމިޓް މިއަދު ބާއްވައިފިއެވެ. މި ސަމިޓް ބާއްވާފައިވަނީ ގްލޯބަލް ޕާޓްނަރޝިޕް ފޮރ އެޑިޔުކޭޝަން (ޖީ.ޕީ.އީ)ގެ އެހީތެރިކަމާއެކު، ޔުނިސެފް އާއި މިނިސްޓްރީ އޮފް އެޑިޔުކޭޝަން ގުޅިގެންނެވެ.
މި ޖޮއިންޓް އެޑިޔުކޭޝަން ސެކްޓަރ ރިވިއު ވަނީ 3 މަރުޙަލާއަކަށް ބަހާލައިގެން ކުރިއަށްގެންގޮސްފައެވެ. މިގޮތުން ސްކޫލް ހިންގުން އިތުރަށް ހަރުދަނާކުރުމަށްޓަކައި ބޭނުންވާ ދާއިރާތައް ދެނެގަތުމަށް ސްކޫލްތައް އިވަލުއޭޓްކުރުމުގެ މަސައްކަތް ކުރިއަށް ގެންދިޔުމުގެ އިތުރުން މިނިސްޓްރީއާ އަދި މިނިސްޓްރީގެ ޑިޕާޓްމަންޓްތަށް ރިވިއުކޮށް އެކަމާއި ގުޅޭ މަޝްވަރާތައް ކުރިއަށް ގެންދެވުނެވެ.
މި ސަމިޓު ފެށުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ޑރ. އިސްމާޢީލް ޝަފީޢު ވިދާޅުވީ، ރާއްޖޭގެ ތަޢުލީމީ ދާއިރާއަށާއި ޒުވާނުންނަށް ދިމާވާ އެކި މައްސަލަތަކުގެ ހައްލަކީ މަތީ ސާނަވީއަށް ކިޔަވާ ދަރިވަރުންގެ އަދަދު އިތުރުކުރުން ކަމަށެވެ. އެގޮތުން މި ލަނޑުދަނޑި ޙާސިލުކުރުމަށް މިދިޔަ އަހަރުގެ ތެރޭގައި މާލެއާއި އަތޮޅުތައް ހިމެނޭހެން 23 ސްކޫލެއްގައި މަތީ ސާނަވީ ތަޢުލީމު ކިޔަވާ ދަރިވަރުންގެ އަދަދު އިތުރުކުރުމަށް ޕައިލެޓު ޕްރޮގްރާމެއް ކުރިއަށްގެންގޮސްފައިވެއެވެ. މީގެ ސަބަބުން މަތީ ސާނަވީ ތަޢުލީމު ކިޔަވަން ފެށި ދަރިވަރުންގެ އަދަދު 2023 ވަނަ އަހަރާ އަޅާބަލާއިރު މިދިޔަ އަހަރު 77 އިންސައްތަ އިތުރުކަން މިނިސްޓަރ ވަނީ ފާހަގަކުރައްވާފައެވެ. މީގެ އިތުރުން ރައީސުލްޖުމްހޫރިއްޔާގެ ލަފާފުޅާއި އިރުޝާދާ އެއްގޮތަށް، މަތީ ސާނަވީއަށް ކިޔަވައިދޭ ސްކޫލްތަކުގައި ޖާގަ އިތުރުކުރުމަށް އައު މަސައްކަތްތަކެއް މިއަހަރު މާލޭގައި ފެށޭނެކަން މިނިސްޓަރ ފާހަގަކުރެއްވިއެވެ.
މި ސަމިޓްގެ މަޤްޞަދަކީ ދިވެހިރާއްޖޭގެ ތަޢުލީމީ ދާއިރާއަށް ލިބިފައިވާ ކުރިއެރުމާއި ދިމާވާ ގޮންޖެހުންތައް ފާހަގަކޮށް އެކަންކަން ހައްލުކުރުމަށް ކުރެވޭނެ މަސައްކަތްތަކާ ގުޅޭގޮތުން މަޝްވަރާކުރުމެވެ. އަދި މީގެ އިތުރުން ގްލޯބަލް ޕާޓްނަރޝިޕް ފޮރ އެޑިޔުކޭޝަން (ޖީޕީއީ) ގެ އެހީތެރިކަމާއެކު މިނިސްޓްރީއާއި ޔުނިސެފް ގުޅިގެން 2024 ވަނަ އަހަރުގެ ތަޢުލީމީ ދާއިރާގެ ފައިނަލް ރިވިއު އެކުލަވާލުމުގެ މަސައްކަތް މި ސަމިޓުގައި ކުރިއަށްގެންގޮސްފައިވެއެވެ. ތަޢުލީމީ ދާއިރާގައި މަސައްކަތްކުރައްވާ 80 އަށްވުރެ ގިނަ ފަންނީ ބޭފުޅުންނާއި ދައުލަތުގެ ބައެއް ވުޒާރާތަކުގެ އިސްވެރިން މި ސަމިޓުގައި ބައިވެރިވެވަޑައިގެންނެވިއެވެ.