އިންޑިއާގެ ވެރިރަށް ނިއު ދިއްލީގައި ބޭއްވުމަށް ހަމަޖެހިފައިވާ އިންޑިއާ ރިޕަބްލިކް ޑޭ ކޭމްޕް 2025 ގައި ދިވެހިރާއްޖޭގެ ޤައުމީ ކެޑޭޓް ކޯގެ ބައިވެރިންނާ ސްޓޭޓް މިނިސްޓަރ ހުސައިން ސަޢީދު މުޙައްމަދު ބައްދަލުކުރައްވައިފިއެވެ. މި ކޭމްޕްގައި ރާއްޖެއިން 4 ކެޑޭޓް ދަރިވަރުންނާއި އެއް އޮފިސަރަކު ބައިވެރިވެއެވެ. މި ކޭމްޕް ކުރިއަށްދާނީ 2025 ޖަނަވަރީ 15 އިން 2025 ޖަނަވަރީ 30 އަށެވެ.
 
ދިވެހިރާއްޖޭގެ ޤައުމީ ކެޑޭޓް ކޯގެ ފަރާތުން ފާއިތުވެދިޔަ 14 އަހަރު މި ކޭމްޕްގައި ބައިވެރިވެފައިވާއިރު، މި އަހަރު ބައިވެރިވާ 4 ކެޑޭޓުންގެ ތެރޭގައި ހިމެނެނީ 2 ފިރިހެން އަދި 2 އަންހެން ދަރިވަރުންނެވެ.
 
ކޭމްޕްގެ ތެރޭގައި ބައިވެރިންނަށް އިންޑިއާގެ އިސް ވެރިންނާ ބައްދަލުކުރުމުގެ ފުރުޞަތު ލިބިގެންދާނެއެވެ. މީގެ ތެރޭގައި އިންޑިއާގެ ރައީސް، ޕްރައިމް މިނިސްޓަރ އަދި ނެޝަނަލް ކެޑޭޓް ކޯގެ ޑިރެކްޓަރ ޖެނެރަލް ހިމެނެއެވެ.
 
މި ކޭމްޕްގެ ބައިވެރިންނަށް އިންޑިއާގެ މަޝްހޫރު އާސާރީ ތަންތަނަށް ޒިޔާރަތްކުރުމުގެ ފުރުޞަތު ލިބިގެންދާނެއެވެ. މީގެ ތެރޭގައި އާގްރާ، ތާޖް މަޙަލް އަދި ޤުޠުބް މިނާރް ފަދަ ތަންތަން ހިމެނެއެވެ.
 
މި ކޭމްޕަކީ ދިވެހި ކެޑޭޓުންނަށް އިންޑިއާގެ ސަގާފަތާއި ތާރީޚާ ބެހޭ މަޢުލޫމާތު އުނގެނި، ދެ ޤައުމުގެ ގުޅުން ބަދަހިކުރުމަށް ލިބޭ މުހިންމު ފުރުޞަތެއް ކަމުގައި ބެލެވެއެވެ.