އަތޮޅުތެރޭގެ ސްކޫލްތަކުގެ އިސްވެރިންނަށް އަމާޒުކޮށްގެން ހިންގުނު "ސީނިއަރ ލީޑަރޝިޕް އެންހޭންސްމަންޓް" ވޯކްޝޮޕް ސިލްސިލާތައް ކާމިޔާބުކަމާއެކު ނިންމާލައިފިއެވެ. ދ. އަތޮޅު ކައުންސިލް ސެމިނަރ ރޫމްގައި ބޭއްވުނު މި ވޯކްޝޮޕްތައް ނިންމުމުގެ ރަސްމިއްޔާތު ޝަރަފްވެރިކޮށްދެއްވީ، މިނިސްޓަރ އޮފް ސްޓޭޓް ފޯ އެޑިއުކޭޝަން ޑރ. އަޙުމަދު މުޙައްމަދެވެ.
މިނިސްޓްރީ އޮފް އެޑިޔުކޭޝަންގެ އެޑިއުކޭޝަން ޑިވެލޮޕްމަންޓް ޕްރޮފެޝަނަލް އަލްފާޟިލް އަބްދުﷲ އިސްމާއިލް ވަނީ ވޯކްޝޮޕް ސިލްސިލާތަކުގެ ފުރިހަމަ ޚުލާސާއެއް ހުށަހަޅުއްވާ ދެއްވާފައެވެ. މީގެ އިތުރުން، މިނިސްޓްރީގެ ޕާމަނަންޓް ސެކްރެޓަރީ ވަނީ ތައުލީމީ ދާއިރާ އިތުރަށް ކުރިއެރުވުމަށް އަމާޒުކޮށްގެން ކުރިއަށް ރޭވިފައިވާ ޕްރޮފެޝަނަލް ޑިވެލޮޕްމަންޓްގެ މަސައްކަތްތަކުގެ ތަފްސީލުތައް ވެސް ހިއްސާކުރައްވާފަ އެވެ. މި ރަސްމިއްޔާތުގައި މިނިސްޓްރީގެ އެކިއެކި ޑިޕާޓްމަންޓްގެ އިސްވެރިން ބައިވެރިވަޑައިގެންނެވިއެވެ.
ސްކޫލްތަކުގެ އިސްވެރިންގެ ޤާބިލުކަން އިތުރުކޮށް، އަތޮޅު ސްކޫލްތަކުގައި ހަރުދަނާ ސުޕަވައިޒަރީ ނިޒާމެއް ޤާއިމުކުރުމުގެ މަޤްޞަދުގައި ބޭއްވުނު މި ވޯކްޝޮޕްތަކުގެ ސެޝަންތައް ނަންގަވައިދެއްވީ ދިވެހިރާއްޖެ، މެލޭޝިއާ، އަދި ދެކުނު އެފްރިކާގެ ފަންނީ ތަޖުރިބާކާރުންނެވެ. އަދި ހުރިހާ އަތޮޅެއްގެ ސްކޫލްތަކުގެ އިސްވެރިން ހިމެނޭހެން ޖުމްލަ 2800 ބޭފުޅުން ވަނީ ބައިވެރިވެވަޑައިގެންފައެވެ.