ބައިނަލްއަޤްވާމީ ތަޢުލީމީ ދުވަހާ ގުޅުވައިގެން، ޔުނިސެފާއި މިނިސްޓްރީ އޮފް އެޑިޔުކޭޝަނުން ގުޅިގެން 'ޑެވެލޮޕިންގ އަ ޑިޖިޓަލީ އެނޭބަލްޑް ލަރނިންގ އެކޯސިސްޓަމް އިން މޯލްޑިވްސް' މި މައުޟޫޢުގެ މައްޗަށް މުހިންމު ޕެނަލް ޑިސްކަޝަން އެއް ބާއްވައިފިއެވެ.
މިއަދު އިމާދުއްދީން ސްކޫލުގައި ބޭއްވުނު މި ބައްދަލުވުމުގައި، ޤައުމީ ފެންވަރުގައި ތަޢުލީމީ ތަޖުރިބާތައް އިތުރަށް ފުޅާކުރުމަށް ޑިޖިޓަލް ޓެކްނޮލޮޖީގެ އިތުރުވަމުންދާ ދައުރު ދިރާސާކުރުމަށްޓަކައި ތަޢުލީމީ އަދި ޓެކްނޮލޮޖީ ދާއިރާގެ އިސް ފަރާތްތަކުން ބައިވެރިވިއެވެ.
މި ޕެނަލްގައި ހިމެނިވަޑައިގަންނަވާ ބޭފުޅުންގެ ތެރޭގައި ހިމެނެނީ ސްޓޭޓް މިނިސްޓަރ އޮފް އެޑިޔުކޭޝަން ޑރ. ޢަބްދުއްލަޠީފް މުޙައްމަދު، ދިވެހިރާއްޖޭގެ ޤައުމީ ޔުނިވަރސިޓީގެ ޑެޕިއުޓީ ވައިސް ޗާންސެލަރ ފޮރ އެކަޑެމިކް އެފެއާޒް ޑރ. ޢަލީ ފަވާޒު ޝަރީފް، ވިމެން އިން ޓެކް މޯލްޑިވްސްގެ ކޯ-ފައުންޑަރ އައިޝާ ޢަދުނާން، އަމީނިއްޔާ ސްކޫލްގެ ލީޑިންގ ޓީޗަރ ޝަޠްރަތު ޝާކިރު، ޖަވާބު ޕްރައިވެޓް ލިމިޓެޑްގެ ސީއީއޯ މުޙައްމަދު ޖައިލަމް، ދިރާގުގެ ޗީފް ޓެކްނޮލޮޖީ އެންޑް އިންފޮމޭޝަން އޮފިސަރ މުޙައްމަދު މުސްޢަދު، އަދި ވިލާ ކޮލެޖްގެ ދަރިވަރެއް ކަމުގައިވާ އިސްމާޢީލް ލޫތު ޝަހީމެވެ.
މި ބައްދަލުވުމަކީ ބަދަލުވަމުންދާ ދުނިޔެއަކަށް ދިވެހިރާއްޖޭގެ ކުރިމަގުގެ ޖީލު ތައްޔާރުކުރުމަށްޓަކައި، އެކުލެވޭ އަދި ދުރު މުސްތަޤުބަލަށް އަމާޒުކުރެވިފައިވާ ތަޢުލީމީ ނިޒާމެއްގެ ޤައުމީ ތަޞައްވުރު ކުރިއަށް ގެންދިއުމަށް އެޅޭ މުހިންމު ފިޔަވަޅެކެވެ.